Póstlisti Vín & Matur 21.5.2004
 
Góðan daginn,
 
 
RIETINE CHIANTI CLASSICO ER KOMIÐ AFTUR
 
Rietine Chianti Classico sem hefur verið ófáanlegt í einhverjar vikur er nú komið aftur í Vínbúðirnar Heiðrúnu og Kringlunni.  Þetta er nýr árgangur 2002.  Sá árgangur var erfiður víða á Ítalíu vegna fremur lágs hitastigs og mikilli rigninga.  Ég minnist þess t.d.. að hafa verið á rölti í Flórens ásamt Ingó mági mínum þegar yfir okkur dembtist þessi þvílíka rigning.  Þegar við náðum áfangastað í vínbúðunni Enoteca Bonatti var okkur tjáð að í þessum sama stormi hafi rignt hagli norðar á Ítalíu, t.d. á Valpolicella og Amarone vínekrurnar í kringum Veróna og ollið þar miklum skemmdum á berjum og ungum vínvið.  Hættan á tíðum rigningum er líka sú að berin gleypi í sig of mikinn vökva og verði vatnskennd, en einnig að sýrustig verði of hátt ef lítið sést til sólar (minni sól  = minni þroski = súrari ber).
 
Þessa galla er hvergi að finna í Rietine Chianti Classico 2002.  Í venjulegu ári framleiða Gaffuri hjónin tvö metnaðarfyllstu vín sín þ.e. Chianti Classico RISERVA og TIZIANO frá bestu vínekrum sínum þar sem vínviður hefur náð ákveðnum þroska og jarðvegur og loftslag sem ákjósanlegast (yfirleitt þær vínekrur sem liggja hæst og til suðurs).  2002 voru þessi tvö vín ekki framleidd heldur voru allar þessar þrúgur settar í staðinn í litla bróður, Chianti Classico.  Og þar sem Tiziano er að mestu leyti úr þrúgunni Merlot er óvenju hátt hlutfall af þeirri þrúgu í 2002 árganginum af Chianti Classico.  Í erfiðu árferði sem þessu þá reynir líka á hæfileika og ástríðu framleiðandans til að kemba vínekrurnar dag eftir dag og týna aðeins þær þrúgur sem náð hafa viðunandi þroska en henda einfaldlega hinum eða selja til þeirra sem kjósa magn umfram gæði.
 
Hver sem ástæðan er þá kom það skemtilega á óvart hvað 2002 árgangurinn af þessu víni er góður.  Greinilegt að Mario Gaffuri er einn af þeim framleiðendum sem geta framleitt gott vín sama hvert árferðið er.  Eina sem gerist er að karakter vínsins breytist en ekki endilega gæði þessi.
 
Rietine Chianti Classico 2002 hefur þannig annan persónuleika en 2001.  Rietine 2002 hefur t.d. mildari tannín en 2001 og því aðgengilegra strax svo ungt - er sætara í munni, kjötmeira og angar af þroskuðum, dökkum kirsuberjum fremur en villtum skógarberjum, jafnvel krækiberjum sem einkenndu 2001.  Rietine 2002 hefur þó enn sterkan brag af þeim karakter sem mér finnst mest heillandi í fari 2001; sveitalegan þokka.  Þetta persónulega vín er eins langt frá því að vera alþjóðlegt og komist verður.  Uppruni þess er augljós - vínið gæti hvergi annars staðar verið framleitt en í Chianti Classico, á lítilli vínekru við bæinn Gaiole í nágrenni Siena.
 
RIETINE Chianto Classico 2002   1.590 kr  (fæst einungis í Vínbúðunum Kringlunni og Heiðrúnu)
 
  
njótið heil,
Arnar
ps. munið að ólífuolían frá Rietine fæst í KOKKU á Laugaveginum á 1.650 kr.